top of page

Ang Aming Simula

Ayon sa matandang kasaysayan, ang imahen ni Sta. Rosa de Lima ay pag-aari ng isang anak ng Kastila na nagngangalang Doῆa Geronima. Siya ay nagkasakit ng ketong at naninirahan sa isang yungib na nasasakupan ng Bagong Ilog. Sa paglipas ng panahon, ito ay tinaguriang yungib ni Doῆa Geronima at iniiwasan ng mga tao dahil sa napabalitaang mga hiwaga at kababalaghang nagaganap doon.

            Ayon sa isang salaysay, ang imahen ni Sta. Rosa de Lima ay natuklasan ng matalik na magkaibigang Celestino Cruz na taga Sumilang at Ubaldo Intalan na taga Bagong Ilog sa kanilang daan pauwi mula sa bahay ng nililiyag nilang dalaga. Nakalanghap sila ng mabangong amoy ng bulaklak ng “dama de noche” galling sa yungib. Nang ito ay kanilang nilapitan, nanggilalas sila ng matambad sa kanila ang imahen sa isang giwang ng isang malaking puno.

            Inuwi ng magkaibigan ang imahen sa Bagong Ilog at dinala kinabukasan sa malaking simbahan sa kabayanan. Dumagsa ang mga tao at napag-alamang ito ay imahen pala ni Sta. Rosa de Lima. Sa paglipas ng taon, nagging makahulugan at nagbigyang-sigla ang taunang pista sa paghalinhinan ng Bagong Ilog at Sumilang na sinusundo si Sta. Rosa at maninirahan ng isang taon sa kanilang bayan. Ito ang nagbigay-daan sa pagkatatag ng parokya ng Sta. Rosa de Lima.

  • 1969 – Setyembre 10. Pagkatatag ng Sta. Rosa de Lima na sumasakop sa mga Barangay ng Bagong Ilog at Sumilang.

  • 1970 – Hulyo. Pagkilala kay Fr. Sixto Ramirez bilang unang Kura Paroko.

  • 1971 – Mayo. Paghalili ni Msgr. Danilo Pascual bilang bagong Kura Paroko.

  • 1972 – Marso. Pagbuo ng Sta. Rosa de Lima Cooperative Credit Union Inc.

  • 1975 – Abril.  Ang unang “Sunduan” ay naganap na siyang naging pangunahing tradisyon sa pista ng mahal na patrona Sta. Rosa de Lima.

  • 1977 – Marso 11. Ang parokya ng Sta. Rosa de Lima ang naging lugar ng ordinasyon ni Rev.  Fr. Marcel Prudente.

  • 1979 – Agosto 25. Pagbasbas ni Jaime Cardinal Sin ng kasalukuyang simbahan.

  • 1980 – Hunyo 21. Ang pagbubukas ng Sta. Rosa de Lima Learning Center. Tinawag itong Sta. Rosa Parochial School noong 1980.

  • 1983 – Nobyembre 6.  Pagkilala kay Msgr. Isidro Jose bilang Kura Paroko.

  • 1986 – Pagbuo ng Rt. Rev. Msgr. Isidro Jose ng Sta. Rosa de Lima Foundation Inc.

  • 1990 – May 4. Paghalili ni Msgr. Rodolfo Gallardo bilang bagong Kura Paroko.

  • 1994 – pagpapagawa ng apat na palapag na gusali ng Sta. Rosa Parochial School.

  • 2004 – Pebrero 24. Pagkilala kay Rev. Fr. Pedro Enrique Rabonza IV bilang Kura Paroko.

  • 2008 – Setyembre 23. Paghalili ni Rev. Fr. Mar Baranda bilang bagong Kura Paroko.

  • 2015- July 20. Paghalili ni Rev. Fr. Arnold Eramis bilang bagong Kura paroko ng SRDL.

 

 

Awit Kay Sta. Rosa de Lima

 

KORO: Santa Rosa de Lima

Aming Butihing Patrona

Iadya mo kaming lagi na

Sa salot at kapansanan

Sa laot ng karamdamang

Daratal sa aming tahanan

 

 

  1. Isinilang kang kay ganda

Sa Lima, Peru ay mutya

Ang katulad mo’y rosas ng pagsinta

At tanan sayo’y nahalina.

 

  1. Isabel ang piling ngalan

Nang ikaw ay bininyagan

Dahil sa rosas wangis at kariktan

Ang Rosa naging palagian. (koro)

 

 

  1. Rosas kang ubod ng bango

Halimuyak mo’y pagsuyo

Ang pag-ibig mo at ng iyong puso

Inialay ng buo kay Kristo.

 

  1. Nang ika’y munting bata pa

Namulat ka sa pagsamba

Nag-ayuno ka at nagpenitensya

Nang wagas sa puso’t kalul’wa. (koro)

 

  1. Nang ganap ka nang dalaga

Nag-ibayo ang panata

At buhay ni Santa Cath’rine de Sienna

Ang siyang tinularan t’wina.

 

  1. ‘Sang araw may pumuna

Sa kutis mong pambihira

Dagling namuhi sa sariling ganda

Kung kaya’t katawa’y dinusta. (koro)

 

  1. Upang matularan lamang

Ang pasyon ni Kristong hirang

Manipis na pila, hugis-bilugan

Sa ulo’y pinakong lagian.

  1. Ang lagi mong panalangin

Sa Panginoong Diyos natin

Sana’y dagdagang hirap at tiisin

Nang sa ‘yong puso’y marapatin.

 

 

  1. Sa isa mong pangitain

Kagandahan mo’y napansin

Ni Hesukristong laging mairogin

Na ikaw ang kab’yak , kapiling.

 

  1. Sa gulang tatlumpu’t-isa

Sumakabilang buhay ka

Katuwaan mo’y wagas, walang hanggan

Sapagka’t mithi’y natupad na. (koro)

 

  1. T’wing ika-dal’wamnpu’t-tatlo

Buwan ng Agosto’y marapat

Na ipagdiwang, purihin ng lahat

Ng santang matapat.

  1. Ang dinanas mong pasakit

Ay abot hanggang sa langit

Ang Panginoon sa’yo ay naakit

Biyaya Niya’y iyong nakamit. (koro)

  1. Sa aming nayo’y sugo ka

Ng ating Poong Bathala

Itinalagang sa ‘mi’y aaruga

Sa mga kampong masasama.

 

  1. Sa yungib ‘ka’y natagpuan

Sa ami’y dalampasigan

Nang dal’wang mangingisdang nagulantang

Sa tanglaw noon lang namasdan. (koro)

  1. Ang dal’wa nga’y nag-uunahan

Sa pag-aangki’t karapatan

Ang isa’y tubo sa nayong Sumilang

Ang isa’y ditto ang tahanan.

 

  1. At ang napag-kasunduan

Sa bawa’t tao’y salitan

Sa pagdiriwang ng ‘yong kapistahan

At sila’y kap’wa nasiyahan. (koro)

  1. Aming mga panawagan

Sana ay laging pakinggan

Na idudulog sa D’yos Amang Hirang

Nang kami’y kanyang kaawaan. (koro)

Novena para kay Sta. Rosa

 

Butihing Sta. Rosa de Lima, / mabunying Patrona ng aming parokya, / sa pamamagitan ng iyong kabanalan / sa gitna ng mga pagsubok at hilahil sa daigdig na ito / ay inaakit mo ang mga tao sa pagbabalik-loob sa Diyos / at sa pagtahak sa landas ng kabanalan. Ang iyong kabanalan noong ikaw ay nabubuhay pa / ay malakas na batubalani na humihikayat sa lahat / na ikaw ay pamarisan at sundan. Kapuri-puri ang iyong kababaang-loob / at kahanga-hanga ang iyong pagkamatiisin / at pagmalasakit sa mga nangangailangan.

Isinasamo namin sa iyong pamamagitan / na kami’y iyong paginhawain sa karalitaan, / palakasin laban sa mga pagsubok, / pasiglahin sa pagsang-ayon sa kalooban ng Diyos / at pagsasagawa ng kabanalan at tulungan mo kami na makamit ang biyayang  ito……

(banggitin ang kahilingan)

 

Dakilang Sta. Rosa de Lima, / gabayan mo ang aming parokya at ang bawat isang taga rito. / Sa iyong pamamatnubay, / makapagtatag nawa kami ng isang  sambayanan ng Diyos / na katatagpuan ng malalim na pananampalataya, / matatag na pag-asa, at maalab na pag-ibig sa Diyos at sa isa’t-isa / at maligayang naglalakbay na sama-sama / patungo sa kahariang walang hanggan ng Ama. / Ang lahat ng ito ay hinihiling namin sa pamamagitan ni Hesukristong Panginoon. Siya nawa.

Article contributed by Trixie Adarayan

bottom of page